صباح الخير جميعا ❤

كلنا منحلم بجسم صحي و سليم وببشرة نقية و صافية و طبعا في كتير طرق لحتى نحصل عهالشي و اسهل طريقة هي ما يسمى بال ديتوكس .
شو يعني ديتوكس (detox) :
الديتوكس هو مصطلح معناه تنقية الجسم من السموم المتراكمة فيه باختصار .

الديتوكس بيساعد ع التنحيف و تخفيض الوزن و كمان بيعطينا بشرة صافية و نضرة و بيخلينا نحس بالنشاط اكتر من قبل و اكيد بيعطي الجسم الفيتامينات الضرورية الموجودة بالخضار والفواكه ، كمان بيساعد الجهاز الهضمي .
يعني كله فوائد و ما اله اي اضرار 

كيف منعمل ديتوكس ووتر (detox water ) 
في عنا عدة فواكه او خضار ممكن نستعملا و اهمها الليمون الحامض ، النعنع ، التفاح ، الفريز ، البطيخ .
وانا شخصيا بستعمل اي نوع موجود بالبيت عندي 
و فينا ننكه الماء كمان مع الفواكه ب عود قرفة صغير او فانيلا او زعتر او اي عشبة منحب نكهتها ، لان هالشي بساعدنا ان نشرب ماء اكتر بكتير من قبل 
الطريقة ببساطة هي : منجيب اما وعاء الديتوكس الخاص الي بيكون فيه مكان للفواكه خصوصي 
او منجيب اي مرطبان زجاجي عنا و منحط فيه الفواكه مقطعة مع النعنع او القرفة و من ثم منضيف الماء عليهم ومنتركهم فترة 4 ل 5 ساعات و من ثم منشرب المي خلال النهار ، انا بخليهم من الليل وبشربهم الصبح وهيك مرتاحة .
فيكم تخلوا هالشغلة روتين يومي او مرتين بالاسبوع ، حسب ما بترتاحوا . 
وبالهنا والشفا .
😍
هي عدة وصفات للي بيحب 

دمتم بحب . 
❤❤

السلام عليكم ورحمة الله وبركاته .
كيفكم ؟ ان شاء الله تكونوا بصحة و سعادة وخاصة هالاوقات موسم امتحانات و كلنا بالهوا سوا .
اليوم التدوينة بسيطة بس فعالة و اكيد رح يفرحوا فيها كتير مهووسين المنكور و الاظافر مثلي ، وخاصة ازا كنتي من النوع الي بيخبص الدنيا وقت المنكور .

التدوينة بتحكي عن شي انتشر بالفترة الاخيرة وبيستعملوه المحترفين بالصالونات او بالدروس لتعليم ديزاينات الاضافر و هو بينشرا من اماكن خاصة و ما اعتقد متوفر في البلاد العربية حاليا ، بس فيكم بسهولة تعملوا واحد بانفسكم و متل ما بيقولوا 
الحاجة أم الاختراع ، هالشي متل سائل بيندهن حول الاضافر مشان يحمي الاصبع من التلوث بالمنكور وهو بينشف بسهولة وبينشال بسهولة .


نبدأ بحمدالله .
نحتاج لاصق او غراء الي بيستعملوه للخشب او الورق ومو مهم النوعية ، اي شي بالبيت .
ماء 
علبة بحجم صغير ، ممكن علبة الثوم الي بتجي مع الفاست فود . 
انا استعملت هالنوع .

اول شي بدنا نحط كمية نص العلبة تقريبا من الغراء او اللاصق و بعدها نضيف شوية ماء يعني بدنا نخفف الغراء بكمية قليلة من الماء حتى يخف مفعول اللاصق 
منحركهم منيح و بس .

ولا أسهل صحيح ؟!
 سهلة وبسيطة وغير مكلفة و مالها اضرار و بتريح خاصة لما بدك تحطس منكور عايدك اليسار بتحافظ عالمنكور عالاضفر فقط بدون ما يتلوث الاصبع و تتعفس الدنيا .
طريقة الاستعمال عالاضفر سهلة كالتالي 

قبل ما تبدي بوضع المنكور ادهني شوي من الخليط الي ساويناه فوق حول الاضافر بكل اصبع و عطيه حوالي دقيقتين لتلت دقايق لينشف

 من ثم فيكي تلوني الاضافر و ما بهمك ازا اجا شي عالاصبع لانو رح ينشال بكل سهولة لما تخلصي . فيكي تشيليه بايدك او باستخدام عود الخشب او قصاصة الاضافر . اختاري المناسب لك .
اهم شي ان الشكل النهائي بكون مرتب ونظيف .

ملاحظة : كتير مهم تغطي العلبة بشكل جيد مشان ما ينشف اللاصق .
دمتم بحب ❤❤ 

السلام عليكم ورحمة الله وبركاته . ❤

صار معروف ان اهم خطوة من خطوات العناية بالبشرة هي الترطيب ثم الترطيب ثم الترطيب . لان كل سواد او اختلاف باللون بالبشرة سببه الجفاف و الاحتكاك . بالتالي بالترطيب بتحافظي عبشرتك من الجفاف و بتحميها من السواد .
في كتير انواع للمرطبات سواء للوجه او للجسم و اليوم بدي احكي عن تجربتي باستخدام منتج بسيط و رخيص و متوفر للكل تقريبا و نتائجه جيدة .
قبل ما ابدأ بشرح المنتج حابة نبه ان العناية والاهتمام بالبشرة مو شرط يكون بمنتجات ذات اسعار خيالية ، يعني ما تحطوا الحالة المادية ك عذر للاهمال و تجاهل النظافة ، انتي فيكي تنظمي روتين خاص فيكي و بالاسعار الي بتناسبك ، ما في اكتر من الشركات يعني فيكي تختاري حسب وضعك المادي و تستفيدي و تحصلي ع نتائج مفيدة و ممتازة .
الاستمرار هو مفتاح الاستفادة يعني مو العبرة بسعر المنتج او اسم الشركة او الماركة .

منبدأ بالمنتج الظريف الجميل وهو صابونة دوف المرطبة
اسمها Dove beauty cream bar 
و هي تحتوي على 1/4 كريم مرطب
و محتوياتها مواد منظفة ، مرطبة ، مبيضة ، منعشة ، منعمة .
طبعا مذكور انها تحتوي بمقدار الربع على كريم مرطب و هي قطعة للاستحمام تستخدم للوجه والجسم .

انا شخصيا حسيت بالنتيجة من اول استخدام ، لاحظت نعومة فظيعة بالبشرة و كمان ترطيب جميل جدا . استخدمتها حوالي الشهرين بشكل منتظم و اغنتني عن المرطب الصباحي لبشرة الوجه ،  كمان ريحتها ناعمة يعني ريحة نظافة .
ممكن تستعمليها بعد المكياج بتنظف وبترطب بنفس الوقت .
طريقة الاستخدام
مو مذكور طريقة محددة بس انا ببلل وجهي بالماء و بعدين برغي منها بشكل خفيف وبدلك الرغوة لمدة تلت دقاق و بعدين بغسل وجهي .

بنصح فيها جدا كثيرا لرخصها و نتيجتها الجميلة ، فتحت عتجارب اجنبية و لقيت الكل بيمدح فيها وبيستعملوها من سنين وسنين .
موجودة بالازرق والاخضر و الزهر و البني .
شخصيا بستعمل الازرق 😀😁

دمتم بحب جميلاتي 😍 

السلام عليكم ورحمة الله وبركاته .
هالاسبوع تاخرت بالتدوينة لان ماما انكسرت رجلها ، ادعولها بالشفاء رجاء 😢
اليوم رح احكي عن موديل منكور جربتو من كم يوم و عجبني ف رح اشرحلكم الطريقة و ورجيكون الالوان الي اخترتا .

الادوات :
لونين منكور متناسقين مع بعض . ممكن يكونوا نفس اللون بس درجة فاتحة ودرجة غامقة و ممكن لونين مختلفين ، انتي و زوئك . 
اسفنجة شكل مربع 
اسيتون او مزيل منكور مع اعواد قطن .

الطريقة : 
بتاخدي الاسفنجة وبتحطي عليها من اللونين واحد فوق وواحد تحت حسب ما بدك الترتيب عالاضفر . متل هيك

طبعا بدك تنتبهي لحجم الاسفنجة ما تكون كبيرة لحتى ما تلغوص الدنيا . 
بعدين بتطبطبي بالاسفنجة عالضفر حتى يصبغ عليه اللون شوي شوي ما تكبسي كبس 
طبطبة خفيفة ، طبعا ببين معك انو اندمجوا اللونين دمج بطريقة كتير حلوة بدون ما بكون في حد فاصل . 
و بتنضفي الزوايد باعواد القطن مغمسة بمزيل المنكور 
اخيرا بتحطي طبقة منكور شفاف بعد ما ينشفوا الالوان الي قبل ، بيعطي لمعة حلوة وبيحمي الطبقة كمان . 
هي الالوان الي انا جربتا

و هي اشكال والوان مختلفة لتاخدوا منها افكار حلوة

دمتم بحب جميلاتي .❤

السلام عليكم ورحمة الله وبركاته .❤

 كل نهار جمعة ان شاء الله رح يكون في موضوع دسم ومهم غير الموضوعات البسيطة بقلب الاسبوع . وهالجمعة اخترت احكي عن الحواجب .
ملاحظة : الموضوع طويل جدا فمحتاج كاسة نسكافيه .


الحواجب هي اطار الوجه و هي بتتحكم بتغيير الملامح بشكل كبير .
والي مو مقتنع يشوف هالصورة ، بيقتنع بالغصب 😃😂

OMG شي مرعب .
اقتنعتوا ؟
أول خطوة لطريق الاهتمام بالشكل هو الحواجب فلازم تعرفي الشكل الي بيلبق لملامحك وشكل وجهك وان شاءالله بنهاية الموضوع بتستفادي .


اكيد الكل بيعرف و ملاحظ تغير التريندز تبع الحواجب كل فترة وشفنا الكوارث الي شفناها خلال هالفترات القديمة متل حواجب التشاينيز الي ما ضل حدا ما عمل منها بدون مراعاة لشكل الوجه و تناسق الملامح كالتالي :

طبعا الله لا يعيد هيك موضة . لا واحلى شي الثقة بالنفس وانو ستايلش . 😃😄😂

كمان التاتو او الوشم للحواجب موضة انتهت وماتت وشبعت موت و مميزاتها
● مو حلوة و بتعطي شكل قاسي
● مو كل مرة بتكون الرسمة متطابقة بين الحاجبين
● بتلزمك برسمة وحدة دائمة
●الوانها غامقة غالبا يا اسود غامق يا بني محمر مشوه
● بتعطي كبر بالعمر فوقها
●هاد ما عدا المواد المؤذية الي عم تنحقن بالجلد .
●بالاضافة انو بيلمع و شكل غير طبيعي ابدا .
كرهتكن التاتو وساعتو ما . بس عنجد مو نصيحة ابدا ابدا وفي كتير بدائل .

كمان اجت موضة الحواجب الرفيعة جدا خط و السميكة جدا متل :

الحمدلله مع مرور السنين تحسن الوضع وخفت المآسي . طبعا بمساعدة انتشار السوشال ميديا صرنا نشوف اكتر ونعرف الحلو من البشع .
كمان في نقطة مهمة انو في بعض البنات بتشوف حواجب فنانة معينة وبتجي بتعمل متلا و بتنسى انو هي عندها ملامح خاصة و مميزات خاصة و ما رح يزبطوا حواجب حدا غيرك عليكي .
متل سيرين عبد النور كمان الي وجهها عريض والي وجهها رفيع والي ملامحها ناعمة والضخمة عملت نفس الحاجب و ازا لاحظنا بالصور تطور حواجب سيرين منلاقي الهيكل تبع حواجبا هو زاتو الفرق بالسماكة فقط . يعني هي من الاول ما عندها كسرة بحاجبها و هاد الشي الانسب لوجهها .

كمان مايا دياب من اهم الاشخاص الي هنن مثال عالحواجب العريضة السميكة و هي الي تميزت بستايل خاص فيها كمان بداياتها كانت بحواجب رفيعة جدا بعدين سميكة جدا جدا جدا ولساتا عليها .

ميريام فارس نفس الكلام الهيكل تبع الحواجب هو زاتو الفرق بالسماكة فقط ، يعني ما حدا يحط ببالو فكرة انو تمحي الحاجب تماما وتعملي واحد بشكل جديد لان الله خلقلك اكتر حاجب بيلبقلك و مناسب لشكلك تماما .

من هالكلام الي فوق منستنتج انو احسن شكل هو شكل الحاجب الطبيعي بدون مبالغة سواء بالترفيع او بالتسميك ، يعني خير الامور اوسطها وهاد الدارج حاليا .


هلء رح نبدا اول خطوة  بكيف بتحددي شكل الحاجب البيرفكت المناسب لوجهك :
هي الطريقة متبعة من قبل خبراء التجميل العالميين و هي بتساعد لتحددي النقط الاساسية بالحاجب
عنا بداية الحاجب بدا تكون موازية لبداية الانف حتى ما يكون عنا مسافة بعيدة بين الحاجبين الي بتبين الانف بحجم اكبر وبتشوه الملامح ولا مسافة قريبة بحيث تصغر العيون و تشتت النظر
النقطة التانية هي كسرة الحاجب والنقطة التالتة هي نهاية الحاجب .
طبعا هاد المقياس جدا سهل وبيساعد لتحددي النقط الاساسية بحاجبك .

ما رح احكي عن فتوى النمص او التشقير او التاتو او غيرو لان مو اختصاصي هالشي بس ازا دايقتك شي نقطة تجاهليها و شوفي المفيد . ❤

تاني خطوة طبعا
تنضيف الزوايد بشكل بسيط جدا و تمشيط الحاجب لاعلى باستخدام فرشاية الحواجب الي بتشبه فرشاية المسكرة ، فاذا عندك مسكرة قديمة نضفيها و استعمليها . 😄 مع قص الزوايد الطويلة شوي وانا بحب شكلن طبيعي من قدام بخلين بدون قص .
شكل الفرشاية والمقص للتوضيح :

هلء هيك منصير جاهزين لتعبية الفراغات .  و هون عنا اكتر من طريقة رح نحكي عنهم باختصار .
1) قلم الحواجب العادي :  القلم استعماله سهل والوانه كتيرة و هو حل سريع وعملي وبيعطي الشكل المطلوب مع الانتباه انك تستخدمي بهدوء و بتمويه بدون ما تكبسي عليه ويطلع اللون غامق وحالته حالة
2) قلم الحواجب السائل : بيجي يمتل قلم التخطيط براسين واحد رفيع والتاني سميك بيعطي شكل شبيه بالتاتو من حيث القساوة و اللمعة كمان حل للاشخاص الي بيحبو هيك اطلالة
3) الحنة : هي عبارة عن بودرة بتخلطيها بالماء وبعدين بترسمي الحاجب فيها و بتضل تقريبا مدة اسبوع لعشر ايام وبعدها بتحتاج تجديد .

4) بودرة الحواجب او شادو الحواجب : هاد بيعبي الفراغات بطريقة طبيعية و سهل الاستخدام وشكله حلو .
5) الجل : هو شبيه بالجل الخاص بالايلاينر لونه ثابت و بعبي الفراغات تماما بس بدك تنتبهي للكمية الي عم تحطيها لان الزيادة بتخبص الدنيا  ف ابدي بكمية قليلة و زيديها شوي شوي احسن .
6)ماسكارا الحواجب : في منها الوان لتغيير لون الحاجب الاصلي ، وفي منها شفاف لتثبيت الحاجب . و هي عملية و جميلة وبنصح فيها .

انا شخصيا حاجبي كثيف ف ما بضطر استعمل كتير اشياء .

بعد ما كون قصيت الزوايد بعبي الفراغات الي فوق بشادو الحواجب لون بني غامق و بمموه هالشادو كتير منيح من قدام بدون ما ارسم مربع او مثلث لان جدا جدا بشع تحديد الحاجب بهالشكل . ممكن عبي الحاجب بالجل حسب المناسبة و اخيرا ماسكارا بني غامق لتفتح الحاجب شوي صغيرة .

بعد ما خلص بحط كونسيلر فوق و تحت الحاجب ليضوي المنطقة و نضفها .
هي طريقتي ببساطة حاليا .
و في نقطة كمان كتير كتير مهم يكون لون الحاجب من لون الشعر يعني الي بتصبغ شعرها تنتبه ع هالنقطة لان الحاجب كمان لازم ينصبغ من ذات اللون .
انا بفضل شكل حواجب اودري هيبورن عنجد بحسن رائعين

بالنهاية الوحدة مع التجربة بتعرف شو بيلبقلها و شو المناسب الها .
اقترحولي موضوع للجمعة القادم ان شاء الله .
دمتم جميلات و بحب . ❤❤

السلام عليكم ورحمة الله وبركاته ❤ 

اليوم حابة احكي عن موضوع عم شوفه كتير بالمجتمع حولنا وحولينا وهو احباط الاخرين . 

انو ليش ما فينا نشوف حدا عم يعمل شي ونشجعه هيك ببساطة يعني . ؟ 

يعني دائما منطلع بشغلة المهم ننتقد وبس يعني بتقليلا انو هالبنت بتدرس حقوق بتجي بتقلك يي مسكينة مو طب ، بتقليلا سافرت ع بيروت بتقلك يي مو ع امريكا و تكثر الامثلة . 

يعني والله عيب الي بيعملوا هالحركات ، الشي الي بتشوفيه حلو ، غيرك بيشوفه بشع و الناس أذواق و ما حدا الو أي حق يفرض زوئه عالتاني أو ينتقص من ميوله ورغباته . 

الله خلقنا كلنا مختلفين عن بعض بس هاد مو معناه نحطم بعض ، المفروض نحترم اختلافاتنا شو ما كانت و كيف ما كانت . 

أنا شخصيا ما بحب أتعامل مع هي النوعيات نهائيا وبحس عندهم نقص بشخصيتهم بكملوه بنقد الاخرين وتحطيمهم ، ان هيك بيصيروا هم الكاملين . 

طبعا هاد الكلام ما بيشمل النقد المحترم الي هدفه التشجيع و ابداء الرأي . 

كتير بزعل لما اسمع كلام بهالقسوة من اشخاص يفترض متعلمين و فهمانين .

بتمنى من كل قلبي نقدر نغير هالعادة و ما نقول مجتمعنا متخلف لان المجتمع هو انت وانا و كل حدا حولينا ونحنا لما نغير نفسنا بيتغير كل شي حولينا ، عالأقل قدر الامكان . 

حتى لما تواجهوا بحياتكم هيك نوعيات ، التطنيش هو الحل الوحيد والأمثل ، و كل نقد هو دفعة لقدام و شحنة لننجح اكتر و نبدع اكتر . 

النجاح هو اكبر انتقام 😈 (بلشنا مخططات وانتقام ) 

اعتبروها فشة خلئ مني . 😂 

دمتم بحب ❤❤ 

السلام عليكم ورحمة الله وبركاته . ❤❤

اليوم حبيت احكي عن جزء من عنايتي بالبشرة وهو منتج مشهور ومعروف من ماركة نيتروجينا 
طبعا هو مقشر للاستعمال اليومي و بيوعد ببشرة منتعشة و نشطة و تنظيف لاعمق المسامات . 
كتير ناس كتبوا عنه ريفيوهات و تجارب وهو منتج موثوق لانه تم اختباره من قبل اطباء الجلد يعني بتستعمليه وانتي متطمنة 
وظيفة المقشر عادة تنظيف البشرة من رواسب المكياج الي بتسكر المسام و بتعمل حبوب ومشاكل بالبشرة لذلك ضروري جدا استعمال مقشر بشكل دوري لحماية البشرة وتنظيفها قدر الامكان 
واهم اهم شي الاستمرارية لان شو ما كان المنتج ما حيعطي الفائدة المطلوبة بدون الانتظام والاستمرارية فيه .
بالفعل من اول استخدام بتلاحظي انتعاش فظيع بالبشرة بتحسيها عم تتنفس و بيعطي اشراقة حلوة و نشاط للمسام . 
وريحته فيها نظافة ومو مزعجة ابدا
طريقة الاستعمال اول شي بتبللي وجهك بماء فاتر بعدين بتدلكي وجهك بشكل لطيف بالمقشر لحتى يتوزع وتحسي يحبيباته مزبوط و بعدين بتغسليه .طبعا مع الانتباه لمنطقة العيون 
انا من جهتي حبيته كتير و الي فترة بستعمله بانتظام وواضح من الصورة اني مخلصته :D 
الفترة الجاية ان شاءالله ناوية جرب ماركة جديدة و اكيد رح اعمل ريفيو عنها . 
دمتم بحب يا حلوات .